شوط أول ولا أروع قدمه منتخب مصر للناشئين، أنهاه متقدمًا على صاحب الأرض والجمهور، منتخب قطر، بهدفين دون رد، في قمة عربية مثيرة بالجولة الثانية من دور المجموعات بكأس العالم تحت 17 سنة.
البداية كانت صاروخية من الفراعنة. قبل ما عقرب الساعة يكمل دقيقتين، كان القائد *أحمد صفوت* بيهز شباك قطر بهدف مباغت، بعد عرضية متقنة من أحمد بشير اخترقت دفاع العنابي، ليستقبلها صفوت ويسكنها الشباك، ويشعل مدرجات ملعب إبراهيم خلفان بأسباير.
بعد الهدف، مصر مسابتش قطر تاخد نفسها. سيطرة كاملة، ضغط عالي، وفرص بالجملة. في الدقيقة 5 كان ممكن النتيجة تبقى 2-0، لما انطلق يوسف عبد الله وراوغ كل اللي قابله، وسدد كرة أرضية قوية عدت جنب القائم الأيمن بشعرة وخرجت بره.
الفراعنة فضلوا مسيطرين، وقطر حاولت على فترات متباعدة من غير أي خطورة حقيقية على مرمى مالك عمرو.
وفي الدقيقة 33، جه التأكيد. انطلاقة سريعة من القائد أحمد صفوت، تمريرة حريرية لـ *خالد مختار*، اللي حطها بكل هدوء في شباك أصحاب الأرض، عشان تبقى النتيجة 2-0 لمصر، ويخلص الشوط الأول بتفوق مصري مستحق.
*الفراعنة دخلوا الماتش ده وهم رافعين شعار لا بديل عن الفوز*
بعد الخسارة في أول مباراة قدام اليونان 2-1، كان لازم مصر تكسب النهاردة عشان تحافظ على أملها في التأهل، وترجع تاني للمنافسة في المجموعة الأولى.
أما قطر، فكانت داخلة الماتش بمعنويات عالية بعد ما كسبت بنما 2-0 في أول جولة، لكنها اتصدمت ببداية نارية من المنتخب المصري.
*تشكيلة الفراعنة في الشوط الأول:*
في حراسة المرمى: مالك عمرو
في الدفاع: آدم يوسف – عادل علاء – محمد السيد – محمد جمال
في الوسط: أحمد بشير – عمر عبد الرحيم – يوسف عبد الله – أحمد صفوت
في الهجوم: أدهم حسيب – خالد مختار
بقيادة المدير الفني حسين عبد اللطيف، اللي نجح في قراءة المباراة صح من أول دقيقة.
*السؤال دلوقتي: هل يكمل الفراعنة بنفس القوة في الشوط الثاني؟*
الشوط الأول خلص 2-0، لكن لسه 45 دقيقة تانية. مصر محتاجة تحافظ على التركيز، وتحسم الـ 3 نقاط، وتفتح صفحة جديدة في المونديال.



