جيل زد بين القبول والرفض.. متى يقول الشباب «نعم» ومتى يقولون «لا»؟

تتوالى أمام شباب جيل زد فرص وتجارب متنوعة في مجالات العمل والدراسة والحياة الاجتماعية، غير أن التعامل معها لا يكون دائمًا بالقبول.

فبين الخوف من تفويت تجربة قد لا تتكرر، والقلق من الندم على قرار الرفض، يقف كثير من الشباب أمام اختيارات صعبة، تتطلب الموازنة بين الرغبة في خوض تجارب جديدة، والقدرة على تحمل مسؤولياتها وتبعاتها.

ومع تزايد الوعي بأهمية الوقت والطاقة وتحديد الأولويات، بدأ بعض الشباب يتعاملون مع الفرص برؤية مختلفة، مدركين أن الموافقة على كل شيء ليست دليلًا على النجاح، وأن الرفض في بعض الأحيان يكون خطوة ضرورية لاختيار ما يتوافق مع أهدافهم وقدراتهم.

ورغم تباين تجارب شباب جيل زد مع الفرص، بين من يخشى ضياعها ومن أصبح أكثر قدرة على انتقاء ما يناسبه، تظل طريقة التعامل معها مرتبطة بأولويات كل شخص وطموحاته.

وفي هذا السياق، سأل «النافذه نيوز» ثلاثة شباب من جيل زد عن تجاربهم مع الفرص التي وافقوا عليها خشية فقدانها، والمواقف التي اختاروا فيها الرفض دون الشعور بالذنب.

أحمد محمود، 24 سنة: «بخاف الفرصة متتعوضش»

– في فترات كتير كنت بوافق على فرص لمجرد إنها ظهرت قدامي، حتى لو مش مقتنع بيها بشكل كامل، وكنت بفكر إن ممكن أندم لو رفضتها أو أكتشف بعد كده إنها كانت هتفرق في حياتي، خصوصًا فرص الشغل والتجارب الجديدة.

– ساعات كنت بضغط على نفسي وأحاول أوفق بين أكتر من حاجة في نفس الوقت، حتى لو ده على حساب راحتي أو وقتي، لمجرد إني مكنتش عايز أحس إني ضيعت فرصة ممكن متجيليش تاني.

– لكن مع الوقت بدأت أفهم إن مش كل فرصة مناسبة ليا، وإن الموافقة لمجرد الخوف من ضياعها ممكن تحطني في مسؤوليات أكبر من طاقتي، أو تبعدني عن حاجات أهم بالنسبالي.

– بقيت أفكر كويس قبل ما أوافق، وأسأل نفسي هل الفرصة دي هتضيفلي فعلًا ولا أنا بوافق لمجرد إني خايف أندم، وبقيت مقتنع إن الرفض ساعات بيكون القرار الصح.

منة مصطفى، 23 سنة: «مش لازم أكون موجودة في كل حاجة»

– كنت زمان بحس إني لازم أوافق على أي خروجة أو نشاط أو تجربة جديدة، حتى لو عندي حاجات تانية محتاجة وقتي، وكنت بخاف إن أصحابي يعيشوا تجارب حلوة وأنا أفوتها، أو أحس إني بعيدة عن الأحداث اللي بتحصل حواليّا.

– الموضوع كان بيخليني أوافق على حاجات وأنا مرهقة أو مش حابة أعملها، وبعدها أكتشف إني حملت نفسي فوق طاقتي، وإن الموافقة اللي كنت فاكرة إنها هتفرحني تحولت لضغط ومسؤولية.

– بدأت أتعلم أرفض من غير ما أبرر كتير، خصوصًا لو عندي أولويات تانية أو محتاجة أقعد مع نفسي وأرتاح، وبقيت أفهم إن رفض خروجة أو تجربة مش معناه إني هخسر الناس أو هفوت كل حاجة حلوة.

– دلوقتي بقيت أختار الحاجات اللي شبه اهتماماتي فعلًا، ومش بحاول أكون موجودة في كل مكان، لأن مش كل تجربة لازم أخوضها علشان أحس إني عايشة أو مستمتعة بوقتي.

يوسف خالد، 25 سنة: «مش كل فرصة تستاهل المجازفة»

– في بداية حياتي العملية كنت بوافق على أي فرصة شغل تظهر قدامي، حتى لو المرتب قليل أو طبيعة الشغل مش مناسبة ليا، وكنت شايف إن المهم إني أبدأ وأكتسب خبرة، وخايف لو رفضت الفرصة دي مظهرش غيرها.

– حصل إني دخلت تجارب مكنتش مناسبة لقدراتي أو أهدافي، وكنت بكتشف بعد فترة إني وافقت بسرعة من غير ما أفكر في المقابل اللي هاخده أو الوقت والمجهود اللي هبذله، وده خلاني أندم على بعض قراراتي.

– بعد كده بقيت أدرس كل فرصة قبل ما أوافق عليها، وأسأل عن طبيعة المسؤوليات والمقابل المادي وإمكانية التطور، ولو لقيت إنها مش هتضيفلي حاجة حقيقية مبقتش متردد إني أرفضها.

– اتعلمت إن مش معنى إن فرصة ظهرت قدامي إني لازم أتمسك بيها، وإن ممكن أرفض حاجة دلوقتي علشان أكون متاح لفرصة أنسب بعدين، والأهم بالنسبالي إني أكون ماشي في اتجاه عايز أوصله فعلًا.